Мефодьевсем ҫӗнтернӗ

Ватӑ ҫынсен кунне уявланӑ тапхӑрта  Ҫӗрпӳ округӗнче «кӗмӗл» волонтерсен «Кӗмӗл чун» форумӗ иртнӗ.

Унта Чӑваш Енри 300 ытла ҫын хутшӑннӑ. Пирӗн муниципалитет округӗн чысне Полина Николаева, Светлана Мефодьева, Татьяна Петрова, Елизавета Столяренко, Валерипе Светлана Мефодьевсем хӳтӗленӗ.

Форумӑн программи питех те анлӑ пулнӑ: «кӗмӗл» волонтерсен социаллӑ проекчӗсем пирки куравсем, слайдсем пӑхасси, опытпа паллашасси - ку куракансене питех те кӑсӑклантарнӑ.

«Чи лайӑх «кӗмӗл» волонтер - 2023» республикӑри конкурса пӗтӗмлетнӗ. «Эко-волонтер» номинацире «Трак ен - кедр тӑрӑхӗ» проект ертӳҫисем, Красноармейскинчи Валерипе Светлана Мефодьевсем ҫӗнтернӗ. Вӗсен тӑрӑшулӑхӗпе тимлӗхне пула Трак енре кедр вӑрманӗсем ҫитӗнме тытӑннӑ.

«Демографи» наци проектне пула регионсенче «кӗмӗл» волонтерсен юхӑмӗ анлӑн сарӑлса пырать. Ҫакӑ аслӑ ӑру ҫыннисене тивӗҫлӗ канӑва тухсан пурнӑҫра хӑйсен вырӑнне тупма, хастарлӑхпа палӑрма, ыттисене хӑйсем хыҫҫӑн илсе кайма май парать.

Сергей СЕМИН.